RIZAL – Patay ang isang urban poor leader makaraan tambangan habang sakay ng motorsiklo sa Antipolo City kamakalawa ng gabi.
Kinilala ni Antipolo City Police chief, Supt. Arthur Masungsong ang biktimang si Francisco Abad alyas Ka Muchoy, 60, residente ng Sitio Mabolo, Brgy. Mambugan ng nasabing lungsod.
Habang kaswal na naglakad lamang ang suspek makaraan siguruhing patay na ang urban poor leader sa dalawang tama ng bala sa kanyang ulo.
Naganap ang insidente dakong 7 p.m. sa Atis road, Unit I, Pagrai Hills, Brgy. Mayamot, Antipolo City.
Ayon sa kasama ni Abad na si Roger Graniel, 46, ng Sitio Little Valley, Brgy. Mambugan, kagagaling lamang nila sa isang pulong ng PAGRAI Homeowners Associaition Inc., nang maganap ang pananambang.
Nabatid kay Graniel, angkas niya ang urban poor leader, nang makarinig siya ng dalawang putok ng baril at biglang nalaglag sa kanyang likuran ang biktima.
Nilapitan pa aniya ng suspek ang biktima saka nagsabing “Ito ba ang presidente ng Pagrai!?” bago tumakas.
Si Abad ay dati rin labor leader bago nagsilbi bilang urban poor leader at naglingkod din sa panahon ni Antipolo City Mayor Nilo Leyble bilang political leader.
(MIKKO BAYLON)