DAGUPAN CITY – Inireklamo ng isang bulag na masahista ang 13-anyos binatilyo makaraan ang tangkang pagsasamantala sa Lungsod ng Dagupan.
Ayon sa biktima na hindi na nagpabanggit ng pangalan at nagtratrabaho sa isang mall sa Arellano sa nasabing lungsod, inalok siya ng lalaki ng P500 kapalit ng pakikipagtalik sa kanya.
Una rito, lumapit ang binatilyong suspek sa biktima at nagsabing magpapamasahe.
Noong una ay ayaw sana niya masahiin dahil matagal na siyang hindi tumatanggap ng kustomer na lalaki ngunit mapilit ang suspek.
Habang nasa loob na sila ng kwarto ay hiniling ng masahista sa lalaki na dumapa para malagyan ng langis ngunit malikot ang lalaki at hindi mapakali.
Nang sabihan na ayusin ang pagdapa ay nagbago ang isip ng suspek at sa kamay na lamang nagpamasahe.
Hanggang alukin siya ng P500 kapalit ng malaswang ipapagawa sa kanya ngunit tinanggihan niya at iginiit na hindi ito kasama sa kanilang trabaho.
Dahil sa takot ay nagmamadaling lumabas ang masahista ngunit nauhahan siya ng lalaki at isinara ang pinto. Nagsisigaw ang biktima nang yakapin ng suspek hanggang binuksan din ang pinto at tumakbo ang lalaki.
Ngunit nahuli rin ng gwardiya ang binatilyo na dinala sa himpilan ng pulisya.