HATAW! D'yaryo ng Bayan hatawtabloid.com
KUNG magkaklase sina secretaries Butch Abad, Procy Alcala at President Noynoy Aquino, malamang magkakatabi sila ng upuan.
Sa letter A kasi nagsisimula ang mga apelyido nila.
Ngayon, hindi natin ‘ALAM’ kung dahil pawang sa letter A nagsisimula ang kanilang mga apelyido kung kaya’t ‘NAMUMUKOD TANGI’ at talaga namang ‘BUKOD NA PINAGPALA’ sina Butch A at Procy A sa Gabinete ni PNoy A.
O dahil mga KKK din sila?
Mula nang magsimula ang isyu ng P10-bilyon pork barrel scam, laging nasasabit ang pangalan nina Butch A at Procy A, pero hanggang ngayon ay naririyan pa rin sila.
Hindi natin alam kung sino ang nagtetengang kawali, si PNoy A o sina Butch A at Procy A.?
O talagang may pinaghihiraman lang din sila ng ‘kapal ng mukha?’
Si LRT general manager Al Vitangcol ay hindi nag-resign. Siya ay sinibak ng Pangulo dahil sa pagkakasangkot sa tangkang extortion sa Czech company na sumama sa bidding para makakuha ng kontrata sa pagsu-supply ng bagong bagon para sa MRT at LRT.
Ang pinaka-grabe ay ang pagkakuha ng kontrata sa MRT ng isa niyang kamaganak!
Hindi kaya magagawa ni PNoy A kina Butch A at Procy A ang agarang pagsibak gaya kay Vitangcol?!
‘E kung hanggang ngayon ay naririyan pa rin ang dalawang ‘yan, huwag na tayong magtaka kung bakit unti-unti naghuhulas ang bilib ng sambayanan sa kampanyang anti-korupsiyon ni PNoy A.
O ‘di ba?
Paano maipatutupad ang DAANG MATUWID, kung balu-baluktot ang landas ng mga Gabinete ni PNoy A?!
Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
