Titser na bading binoga ng taxi driver (Nanghipo ng ari)

ILOILO CITY – Sugatan ang bading na guro makaraan barilin ng taxi driver sa Brgy. Salngan, Oton, Iloilo, dahil sa panghihipo ng ari.

Ang biktimang si Marcos Valencia, 48, residente ng Brgy. Trapiche, Oton at nagtuturo sa Oton National High School, ay tinamaan ng bala sa kamay, leeg at katawan ngunit hindi naman napuruhan.

Habang agad naaresto ang driver na kinilalang si Bryan Legada, 22-anyos.

Depensa ng suspek, dinakma ng biktima ang kanyang ari kaya’t nagulat siya at nagalit kaya niya nabaril si Valencia.

Ayon pa sa suspek, tinext siya ng biktima na sunduin at ihatid sa kanilang lugar ngunit imbes sa kanilang bahay, sa kubo nagpahatid si Valencia at doon nangyari ang pagdakma sa kanyang ari.

Itinanggi ng suspek na may relasyon sila ng biktima ngunit matagal na aniya silang textmates at minsan ay niyaya siyang sila ay magtalik. (BETH JULIAN)