Zsa Zsa Padilla, nagsisimula nang makipag-date

ni  Ed de Leon

OKEY lang naman daw sa mga anak ni Mang Dolphy, kung ang kanyang last live in partner na si Zsa Zsa Padilla ay ma-in love na muli sa iba. Nagsimula iyan nang aminin ni Zsa Zsa na nagsisimula na siyang lumabas at makipag-date sa iba naman. After all nga naman, bata pa si Zsa Zsa, at siguro nga kailangan din naman niya ng makakasama sa buhay. Nakalipas na rin naman ang panahon ng pagluluksa para kay Mang Dolphy.

Hindi rin naman nakasal sina Mang Dolphy at Zsa Zsa, kahit na talagang pinagsikapan nilang pakasal noong una. Natagalan naman kasi bago lumabas iyong annulment ng naunang kasal ni Zsa Zsa  sa ama  ng kanyang anak na si Karylle. Nang lumabas  naman ang annulment, dumating na sila sa punto ng paniniwala ni Mang Dolphy na ang mahalaga ay iyong kanilang pagsasama at hindi na ang kasal.

Si Zsa Zsa ang nanatiling kasama ni Mang Dolphy hanggang sa huling sandali ng buhay niyon at hindi man kasal, siya ang itinuring na “biyuda” ni Mang Dolphy. May iba rin namang nakarelasyon si Mang Dolphy in the past, pero ang mga iyon ay may kanya-kanya na ring buhay.

Ang maganda nga lang ay iyong sinasabi ng mga anak ni Mang Dolphy na magkaroon man ng bagong pamilya si Zsa Zsa, hindi naman mawawala roon ang kanilang pagtingin bilang nabiyuda ng ama nila. May isang adopted child, at isang tunay na anak si Mang Dolphy kay Zsa Zsa.

Dahil nga rin sa sitwasyon niyon sa ngayon, sinasabi nilang nai-intindihan nila kung kailangan nga ni Zsa Zsa ng isang makakasama at makakatuwang sa buhay at sa pagpapalaki ng kanyang mga anak. Ibang klase kasi noong magkahiwalay lamang sila ng tatay ni Karylle, dahil buhay iyon at pinangalagaan ang kanyang anak. Ngayong wala na si Mang Dolphy, naiwan kay Zsa Zsa ang mag-isang pagbuhay sa kanilang mga anak.