Sinalpok ng motor bus nagliyab (2 patay, 1 kritikal)

DALAWA ang patay habang isa ang kritikal ang kalagayan matapos salpukin ng motorsiklo ang isang pampasaherong bus na agad namang nagliyab sa Brgy. Anonas, lungsod ng Urdaneta kahapon ng madaling-araw.

Kinilala ang mga namatay na si Joseph Iban, seaman, at residente ng Bgy. Ballige, Laoac, Pangasinan, driver ng motorsiklo, at ang angkas niyang si Julius Pulido, 23.

Kritikal naman sa pagamutan ang isa pang angkas ng motorsiklo na si John Lyndon Ordonez, 18.

Ayon kay Insp. Benny Centino ng Urdaneta City PNP, ang Partas bus na may 49 pasahero ay galing sa Candon, Ilocos Sur at patungo sana sa Pasay City.

Sinasabing lasing ang driver ng motorsiklo dahil pagiwang-giwang ang pagtakbo ng kanilang sasakyan na nagresulta sa pagbangga nila sa kasalubong na bus na minamaneho ni Juanito Zalasar, 35, residente ng Bangar, La Union.

Pagkaraan, sumabog ang makina ng motor na naging dahilan ng pagliyab ng bus ngunit mabilis na nakababa ang mga pasahero.

Nasa kustodiya na ng pulisya ang driver ng bus.

(DANG GARCIA/BETH JULIAN)