Indian nat’l na mall owner dinukot; 1 patay, 1 sugatan

KORONADAL CITY – Patay ang isang security escort at isa pa ang sugatan makaraang dukutin ng apat armadong kalalakihan ang Indian national na may-ari ng malaking mall sa Cotabato City.

Ayon kay S/Supt. Rolen Balquin, chief of police ng Cotabato City, dinukot ng mga kalalakihan si Mike Khemani, may-ari ng Sugni Superstore sa nasabing lungsod.

Inihayag naman ni Aniceto Rasalan, ng Cotabato City government, nagkaroon ng palitan ng putok ang dalawang security escorts ni Khemani at ang armadong mga suspek.

Namatay sa insidente ang security escort na si Kaura Abdul habang sugatan ang kasama niyang si Mustapha Abdulrahim.

Ayon sa report, naglilibot sa kanyang department store ang negosyanteng Indian nang sapilitan siyang tangayin ng mga kalalakihan at pilit na isinakay sa isang sasakyan.

Napag-alaman na nagmamay-ari rin ang naturang negosyante ng mga department store sa Kabacan, North Cotabato at sa Kidapawan City, at dalawang beses na ring nakaligtas sa kidnapping noon taon 2007 at 2009.

(BETH JULIAN)