NAKATAKAS ang 12-anyos dalagita sa mga dumukot sa kanya sa Monte de Piedad, Brgy. Kaunlaran, Cubao, Quezon City kahapon.
Ang biktimang huling nakitang may kausap na babae sa labas ng kanilang bahay dakong 10 a.m. nitong Lunes, ay natagpuang naglalakad sa kalsada ng barangay councilor dakong 4 a.m. kahapon.
Ayon sa salaysay ng biktima, tinakot siya ng babae na may masamang mangyayari sa kanyang ina kapag hindi siya sumama.
Aniya, naglakad lamang sila sa buong maghapon hanggang dalhin siya sa isang bahay at nadatnan nila roon ang dalawang lalaki at isa pang babae.
May nakita rin siyang iba pang kidnap victims sa loob ng bahay.
Nakatulog aniya siya makaraan siyang painomin ng tubig na maaaring nilagyan ng sleeping pills. Paggising niya ay iba na ang suot niyang damit.
Muli aniya silang naglakad dakong 10 p.m. ngunit siya ay nakatakbo at natakasan ang mga suspek.
Ayon kay PO3 Terebio Besa, desk officer ng Quezon City Police District Station 7, ang sindikato na ginagawang sex slaves ang mga dalagita ang posibleng dumukot sa biktima. (HNT)